Badges mark quoted or attributed material (Qur'an, hadith, another author, an opposing view). Unbadged passages are Maulana Wahiduddin Khan's own words.
دو ملک ایک واقعہ p. 360
ہندستان کے شہر بھاگلپور میں24اکتوبر1990ءکو ہندومسلم فساد ہوا، جس کا سلسلہ کئی دن تک جاری رہا۔ اس میں مسلمانوں کا زبر دست جانی و مالی نقصان ہوا ۔ اس کے بارے میں بہت سی رپورٹیں اخبارات میں آچکی ہیں۔ بھاگل پور کے مولانا اکرام الدین قاسمی (پیدائش1938ء)نے ذاتی جائزہ کے بعد ایک مفصل رپورٹ شائع کی ہے، جو104 صفحات پر مشتمل ہے۔ اس رپورٹ کا عنوان ہے بھاگلپور میں آگ اور خون کی ہولی ۔ p. 360
اس رپورٹ کے ٹائٹل پر ایک تصویر ہے، جس میں دکھایا گیا ہے کہ کس طرح سات مسلمانوں کو بے دردی کے ساتھ جلایا اور قتل کیا گیا۔ اس تصویر کے نیچے لکھا ہوا ہے بھاگلپور کے ایک خاندان کے سات افراد کی لاشیں ، جن میں ایک سال کا معصوم بچہ بھی شامل ہے ۔ p. 361
اب دوسری تصویر دیکھیے۔ پاکستان کے شہر کراچی میں 7فروری 1990ء کو مسلم- مسلم فساد ہوا ،جس کا سلسلہ کئی روز تک برابر جاری رہا۔ پاکستان کے مشہور اخبار نوائے وقت (8 فروری1990ء) کے صفحہ اول پر اس کی خبر نمایاں طور پر چھپی ہے۔ اس خبر کی سرخی یہ ہے کراچی میں آگ اور خون کا کھیل ۔ p. 361original + quote
اس سلسلہ میں نوائے وقت (10 فروری1990ء ) کے صفحہ اول پر مزید یہ خبر درج ہے کہ کراچی میں پانچ افراد پیٹ چاک کرنے کے بعد زندہ جلا دیے گئے ۔ یہ المناک اور بہیمانہ واقعہ منگھو پیر روڈ پر ہوا۔ یہاں ایک جلی ہوئی سوزو کی وین سے پانچ مسخ شدہ لاشیں برآمد کی گئیں۔ ان پانچ افراد کو رسیوں کے ساتھ وین کے اندر باندھا گیا اور ان کا پیٹ پھاڑ کر زندہ جلا دیا گیا ۔ p. 361
جو لوگ’’بھاگلپور‘‘ کے واقعہ کو ہندو ظلم کے خانہ میں ڈالتے ہیں، وہ کراچی کے اسی قسم کے واقعہ کو کس کے ظلم کے خانہ میں ڈالیں گے ۔ حقیقت یہ ہے کہ ہمیں ان دونوں واقعات کا کوئی مشترک سبب تلاش کرنا ہوگا۔یہ مشترک سبب صرف ایک ہے۔ اور وہ ہے عدمِ برداشت ۔ p. 361
زندگی ناخوش گوار واقعات کو خوش گواری کے ساتھ برداشت کرنے کا نام ہے۔ اگر آپ اس برداشت کے لیے تیار ہوں تو آپ اپنی زندگی میں کامیاب رہیں گے ۔ اور اگر آپ اس برداشت پر راضی نہ ہوں تو آپ ’’ آگ اور خون‘‘ کے حوالے کیے جائیں گے ، خواہ آپ مسلم ملک میں ہوں یا غیر مسلم ملک میں ۔ p. 361