Badges mark quoted or attributed material (Qur'an, hadith, another author, an opposing view). Unbadged passages are Maulana Wahiduddin Khan's own words.
غیر فطری ردِعمل: جب کوئی خلافِ مزاج بات پیش آئے تو اس کے مقابلے میں آدمی کے روش کی دو مختلف صورتیں ہوتی ہیں۔ ایک جذباتی ردِعمل کا طریقہ، اور دوسرا غیر جذباتی ردِعمل کا طریقہ۔ جذباتی ردِعمل عین وہی چیز ہے جس کو میڈیکل اصطلاح میں الرجی کہا جاتا ہے۔ الرجی کی تعریف اس طرح کی جاتی ہے کہ الرجی نام ہے معتدل حالات میں غیر معتدل ردِعمل کا۔
Abnormal reaction to normal things. مثلاً اپنے خلاف تنقید کو سن کر غصہ ہونا، اسی قسم کی ایک الرجی ہے۔ اگر کوئی شخص آپ کی کسی بات پر تنقید کرتا ہے تو اس کا معتدل اور فطری ردِعمل یہ ہے کہ آپ کھلے ذہن کے ساتھ اس کو سنیں اور کھلے ذہن کے ساتھ اس پر غور کریں۔ اگر تنقید غلط ہے تو آپ کو چاہیے کہ آپ دلیل کے ساتھ اس کا جواب دیں، اور اگر تنقید درست ہے تو سیدھی طرح اس کو مان لیں۔
اس کے برعکس، تنقید کو سن کر بگڑ جانا تنقید کا غیر معتدل اور غیر فطری انداز میں جواب دینا ہے۔ پہلی صورت مریضانہ ذہنیت کا ثبوت ہے، اور دوسری صورت صحت مند ذہنیت کا ثبوت۔ اسی طرح مخالفانہ نعرہ کو سن کر مشتعل ہو جانا، توہین کے کسی معاملے پر بھڑک اٹھنا، اپنے راستے میں کوئی رکاوٹ دیکھ کر بگڑ جانا، اپنی سوچ کے خلاف سوچ کو برداشت نہ کر سکنا، یہ سب جذباتی ردِعمل کی صورتیں ہیں۔ ایسے لوگ ہمیشہ لوگوں کے خلاف نفرت اور تشدد میں پڑے رہتے ہیں۔
وہ زندگی کے مثبت اور تعمیری رخ کا تجربہ کرنے میں ناکام رہتے ہیں۔ اس کے برعکس دوسرا طریقہ غیر جذباتی ردِعمل کا طریقہ ہے۔ اسی کو قرآن میں ہجرِ جمیل کہا گیا ہے۔ یعنی جب اپنے مزاج کے خلاف کوئی بات پیش آئے تو مشتعل نہ ہو کر ٹھنڈے ذہن کے ساتھ اس پر غور کرنا، اور سوچے سمجھے فیصلے کے تحت معتدل انداز میں اس کو جواب دینا۔
اس معتدل جواب کی مختلف صورتیں ہو سکتی ہیں۔ ایک یہ کہ سادہ طور پر بس اس کو نظر انداز کر دیا جائے۔ یعنی وہی رویہ جس کو عام زبان میں اس طرح بیان کیا جاتا ہے: کتے بھونکتے رہتے ہیں اور ہاتھی چلتا رہتا ہے۔ اسی طرح کبھی ہجرِ جمیل کی صورت یہ ہوتی ہے کہ مخالف گروہ کی بدعملی کا جواب خوش عملی سے دیا جائے۔
اس کے پست اخلاق کے مقابلے میں برتر اخلاق کا طریقہ اختیار کر کے اس کو مغلوب کر لیا جائے۔ اسی طرح کبھی حالات کا تقاضا یہ ہو سکتا ہے کہ دباؤ کی سیاست، یعنی پریشر ٹیکٹکس کا طریقہ اختیار کر کے اس کو خاموش ہونے پر مجبور کر دیا جائے۔ ہجرِ جمیل کی کوئی ایک لگی بندھی صورت نہیں۔ حالات کے اعتبار سے اس کی مختلف صورتیں ہو سکتی ہیں۔
تاہم جو صورت بھی اختیار کی جائے وہ سوچے سمجھے منصوبے کی بنیاد پر ہوگی، نہ کہ بلا سوچے سمجھے ردِعمل کی حیثیت سے۔ اس کا بنیادی مقصد اعراض کرنا ہوگا، نہ کہ الجھ جانا۔ وہ ہمیشہ امن کے اصول پر ہوگی، نہ کہ تشدد کے اصول پر۔ اس کے پیچھے کبھی بھی نفرت اور انتقام کا جذبہ نہیں ہوگا، بلکہ صرف یہ جذبہ ہوگا کہ کسی نہ کسی طرح حسنِ تدبیر کے ذریعے معاملے کو ٹال دیا جائے تاکہ زندگی کی گاڑی معمول کے مطابق اپنے مطلوب رخ پر چلنے لگے۔
ہجرِ جمیل کا نشانہ خارجی مسئلہ نہیں ہوتا، بلکہ آدمی کی خود اپنی ذات ہوتی ہے۔ ہجرِ جمیل کا نشانہ یہ نہیں ہوتا کہ خود مسئلے کا خاتمہ کر دیا جائے۔ اس کا نشانہ یہ ہوتا ہے کہ مسئلے کو اپنے خلاف مسئلہ بننے سے روک دیا جائے۔ کتاب مسائل اجتہاد مولانا وحید الدین خان، صفحہ نمبر 233۔