Badges mark quoted or attributed material (Qur'an, hadith, another author, an opposing view). Unbadged passages are Maulana Wahiduddin Khan's own words.
اسلامی تعلیمات کا انسانی پہلو p. 172
اسلام انسانیت کا مذہب ہے۔ اسلام میں جن باتوں کو بتایا گیا ہے۔ ان سب کے پیچھے ایک ہی مقصد کام کر رہا ہے ، اور وہ ہے انسان کے اندر سچی انسانیت لانا۔ انسانی نسلوں کو ایکتا کا سبق دینا۔ انسانی سماج کو سکھ اور شانتی اور ترقی والا سماج بنانا۔ p. 172
اسلام کا مطلب ہے سلامتی۔ اس سے معلوم ہوا کہ اسلام کا خلاصہ سلامتی ہے ۔ اسلام وہ انسان تیار کرنا چاہتا ہے جس کے دل میں ہر ایک کے لیے سلامتی ہو ۔ جو ہر ایک کا بھلا چاہے۔ جو ہر ایک کے ساتھ سلامتی والا سلوک کرے۔ جو ہر ایک کا سواگت مبارک سلامت کےجذبات کے ساتھ کرے۔ p. 173
اسی طرح ایمان کی اصل امن ہے ۔ ایمان کا لفظ امن سے بنا ہے ۔ اس اعتبار سے مومن وہ ہے جو امن پسند ہو ۔ جو خلاف امن باتوں کے مقابلہ میں امن کی باتوں کو پسند کرتا ہو۔ وہ اسی سمت میں بڑھے جدھر امن پایا جائے۔ وہ ان سرگرمیوں میں مشغول نہ ہو جو امن کو توڑنے کا سبب بن جائیں۔ p. 173
اسلام میں سب سے اہم عبادت نماز ہے جو روزانہ پانچ وقت ادا کی جاتی ہے۔ نماز جب پوری ہو جاتی ہے تو آخر میں تمام نمازی اپنے دائیں اور بائیں منہ پھیر کر کہتے ہیں کہ السلام علیکم ورحمتہ اللہ، السلام علیکم ورحمتہ اللہ ۔ ایک بڑے عالم نے اس کا مطلب بتاتے ہوئے کہا کہ نمازی ہر طرف کے تمام انسانوں سے کہتا ہے کہ تم مجھ سے سلامت ہو ، تم مجھ سے سلامت ہو (بِرّ الوالدین للبخاری، اثر نمبر 45)۔ یعنی، تم مجھ سے کوئی خطرہ محسوس نہ کر و۔ تمہاری جان ، مال ، عزت سب مجھ سے محفوظ ہے۔ نماز کی عبادت سے میں ایک ایسا سبق لیکر مسجد کے باہر نکل رہا ہوں کہ تمھارے لیے میرے پاس سلامتی کے سوا اور کچھ نہیں ۔ p. 173original + quote
پیغمبر اسلام نے بتایا کہ أَنَّ الْعِبَادَ كُلَّهُمْ إِخْوَةٌ (مسند احمد، حدیث نمبر 19293)۔ یعنی، تمام بندے آپس میں بھائی بھائی ہیں۔ اسلام آدمی کے دماغ میں یہ بات بٹھاتا ہے کہ تمام انسان ایک ہی باپ اور ماں ( آدم اور حوّا )کی اولاد ہیں۔ اس لیے سب کے جسم میں ایک ہی خون دوڑ رہا ہے سب ایک دوسرےکے لیے بھائی کی حیثیت رکھتے ہیں۔ p. 174original + quote
دو آدمیوں کے درمیان سب سے اونچا اور سب سے پیارا رشتہ بھائی کا رشتہ ہے۔ لوگوں کو ایک دوسرے سے جوڑنے کے لیے سب سے زیادہ طاقت وربات یہ ہے کہ ان کے اندر یہ سوچ پیدا کر دی جائے کہ تم ایک دوسرے کے بھائی ہو۔ اسلام لوگوں میں یہی برادرانہ سوچ پیدا کرتا ہے ۔ اور بلاشبہ انسانیت کے پہلو سے اس سے بڑی کوئی اورسوچ نہیں۔ p. 174
بہت سے انسان جب ایک سماج میں مل کر ر ہیں تو وہ کس طرح رہیں ۔ اچھے انسانی سماج کا بنیادی اصول کیا ہے۔ اس بارے میں حدیث میں ایک ایسا جامع اصول بتایا گیا ہے جو اس سلسلہ کے تمام پہلوؤں کو سمیٹے ہوئے ہے۔ وہ حدیث یہ ہے إِنْ يُحِبَّ لِأَخِيهِ مَا يُحِبُّ لِنَفْسِهِ (صحیح البخاری، حدیث نمبر 13)۔ یعنی، آدمی اپنے بھائی کے لیے وہی کچھ پسند کرے جو وہ خود اپنے لیے پسند کرتا ہے۔ یہ ایک ایسا اصول ہے جس میں تمام انسانی باتیں آجاتی ہیں۔ ہر آدمی کو معلوم ہے کہ کون سی بات اس کو اچھی لگتی ہے اور کون سی بات اس کو اچھی نہیں لگتی۔ کون سا معاملہ اس کو پسند ہے اور کون سا معاملہ اس کی پسند کے خلاف ہے۔ کون سا سلوک وہ اپنے لیے بہتر سمجھتا ہے اورکون سا سلوک اس کو اپنے لیے بہتر معلوم نہیں ہوتا۔ p. 174original + quote
اس طرح ہر آدمی کے پاس ایک بہترین کسوٹی موجود ہے جس کے ذریعہ وہ ہر وقت جان سکتا ہے کہ وہ دوسروں کے درمیان کس طرح رہے ۔ وہ دوسروں کے ساتھ کیا کرے اور کیا نہ کرے۔ اس کسوٹی کے مطابق ہر آدمی کو سماج میں اس طرح رہنا ہے کہ وہ دوسروں کے ساتھ ہر موقع پر وہی برتاؤ کرے جو وہ اپنے لیے چاہتا ہے۔ اور اس برتاؤ سے دور رہے جس کو وہ اپنے لیے پسند نہیں کرتا۔ جب وہ بولے تو اسی کے مطابق بولے اور جب کچھ کرے تو اسی کے مطابق کرے۔ p. 175
اس اصول کی تفصیل قرآن اور حدیث میں ہر پہلو سے موجود ہے۔ مثلاً بتایا گیا ہے کہ تم کسی انسان کو قتل نہ کرو ۔ تم کسی کے خلاف براگمان نہ کرو۔ دوست اور دشمن ہر ایک کے ساتھ انصاف کا معاملہ کرو۔ کوئی برائی کرے تب بھی اس کا جواب بھلائی سے دو۔ کوئی غصہ والی بات کہے تب بھی تم غصہ نہ ہو ۔ اختلافی معاملات میں صلح کا طریقہ اختیار کرو ۔ اپنی کمائی میں سے دوسروں کا حق نکالو۔ اپنےپڑوسی کو کسی قسم کی تکلیف نہ پہنچاؤ۔ اگر تم کسی سے وعدہ کرو تو اس کو ضرور پورا کرو۔ راستہ میں کوئی رکاوٹ ہو تو اس کو راستہ سے ہٹا دو ۔ اسلام سلامتی کا مذہب ہے ۔ جو سلامتی کی بات ہے وہ اسلام کی بات ہے، اور جس بات میں سلامتی نہیں وہ اسلام کی بات بھی نہیں۔ p. 175original + quote
نوٹ یہ تقریر آل انڈیا ریڈیو (نیشنل چینل)، نئی دہلی، سے 21مئی 1994کو نشرکی گئی ۔ p. 175
باب چہارم p. 176