Tameer-e-shakhsiyat kamiyaab zindagi ka formula

Danishmandaana tareeqa

Tameer-e-shakhsiyat kamiyaab zindagi ka formula — Maulana Wahiduddin Khan

Badges mark quoted or attributed material (Qur'an, hadith, another author, an opposing view). Unbadged passages are Maulana Wahiduddin Khan's own words.

Contents (314 chapters)

دانش مندانہ طریقہ: صحابیِ رسول عمیر بن حبیب بن خماشہ نے اپنے بیٹے کو نصیحت کرتے ہوئے کہا: «من لا يرضى بالقليل مما يأتي به السفيه يرضى بالكثير». المعجم الاوسط للطبرانی، حدیث نمبر 2258۔ یعنی: جو شخص نادان کی طرف سے پیش آنے والے چھوٹے شر پر راضی نہ ہوگا، اس کو نادان کے بڑے شر پر راضی ہونا پڑے گا۔ اس قولِ صحابی میں اجتماعی زندگی کی ایک حکمت کو بتایا گیا ہے: اجتماعی زندگی کبھی یکساں نہیں ہوتی، اجتماعی زندگی میں ہمیشہ مختلف قسم کے مسائل پیش آتے ہیں۔

اس بنا پر بار بار ایسا ہوتا ہے کہ ایک شخص کو دوسرے کی طرف سے ایسا تجربہ پیش آئے گا جو اس کی مرضی کے خلاف ہوگا۔ ایسے موقع پر صحیح طریقہ یہ ہے کہ اعراض کیا جائے، نہ کہ ٹکراؤ شروع کر دیا جائے۔ اگر آپ ایسے موقع پر ٹکراؤ کا طریقہ اختیار کریں تو وہ ہمیشہ چین ری ایکشن کا سبب بنے گا۔ نتیجہ یہ ہوگا کہ آپ ہمیشہ خارجی مسائل میں الجھے رہیں گے، اور کبھی اپنے منصوبے کے مطابق مؤثر عمل شروع نہ کر سکیں گے۔

دوسروں کے خلاف کارروائی کرنے کا مطلب یہ ہے کہ آدمی نے اپنے آپ کو خود اپنے کام میں استعمال نہیں کیا، بلکہ اس کو دوسروں کی مخالفت میں ضائع کر دیا۔ اس مسئلے کا واحد حل یہ ہے کہ صبر و اعراض کا طریقہ اختیار کیا جائے، دوسرے الفاظ میں، avoidance کا طریقہ۔ اس طرح کے معاملے میں یہی واحد طریقہ قابلِ عمل ہے، کوئی دوسرا طریقہ اس معاملے میں ورک کرنے والا نہیں۔ جب آدمی دوسرے کی طرف سے پیش آنے والے ناخوشگوار تجربے پر اعراض کا طریقہ اختیار کرتا ہے، تو وہ اس کے لیے ایک پرو سیلف طریقہ ہوتا ہے۔

اس طرح وہ خود اپنے وقت اور اپنی انرجی کو بچاتا ہے، تاکہ اس کو وہ خود اپنے فائدے کے لیے استعمال کرے۔ تعمیر شخصیت مولانا وحید الدین خان، صفحہ نمبر 318۔